Erakusketa Beheko solairuan:

Sarrera  |  klaustroa  |  Aldi baterako erakusketa aretoak

 

Bilbo, jaietan izenburupean, Euskal Museoak eta Bilboko Udalak bi erakusketa paralelo aurkeztuko dituzte udaldirako: Bilboko Erraldoiak eta Buruhandiak eta 1978-2016 Aste Nagusietako kartelak.

 

1979an, Aste Nagusia Iragartzeko Kartelen lehenengo Lehiaketa antolatu zen, 50.000 pezetako sariarekin. Epaimahaia Jai Batzordeko ordezkariek eta hiriko esparru artistiko zein kulturaleko ordezkariek osatu zuten, eta irabazlea Jose Javier Lacalle “Laka” izan zen.

1980an, Jon Castañares alkatea eta Jai Batzordea ez ziren bat etorri jai-ereduaren inguruan, eta horrek hondatu egin zuen urte hartako Aste Nagusia; ondorioz, bi kartel editatu ziren. Alde batetik, Bittor Allenderena, Udalak antolatutako Lehiaketaren irabazle ofiziala baina Konpartsen Koordinakundeak editatutakoa; eta, bestetik, programatutako ospakizunak iragartzeko asmoz Alkatetzak berak argitaratutakoa, “Bilboko Jaiak” izenpean.

1981etik gaur egunera arte, Aste Nagusia Iragartzeko Kartelen Lehiaketa urtero antolatu izan da, inongo gorabeherarik gabe. Birritan baino ez da geratu eman gabe, 1987an eta 1989an hain zuzen ere; kasu horietan, kartela enkarguz diseinatu zen,lehenengoa Juan Carlos Eguillorri eskatuta, eta bigarrena, berriz, Alberto Quincocesi.

1990etik aurrera, Bilboko Euskal Museoak Cía. de Gargantúa delakoarekin lankidetzan antolatutako “Aste Nagusia 1978-1990” aldi baterako erakusketaren ondorioz, edizio bakoitzeko kartel irabazleak Erakundeari ematen zaizkio, bertan gordeak izan daitezen. Modu horretan, Hiribilduko Jai Artxiboa ari da osatzen, nahiz eta lehenengo bost urteetako jatorrizko irudiak falta diren bilduman.